Hvað er spilling og spilltur þingmaður?

Varaformaður stjórnskipunar- og eftirlitsnefndar Alþingis, Brynjar Níelsson, sver af sér spillingu frændhygli, sérhagsmunagæslu og þaðan af verra, eins og hann segir.

Sami þingmaður hafnar að ræða við þá aðila sem kvarta yfir alvarlegri rökstuddri valdnýðslu og spillingu stjórnsýslunnar og hafnar að gefa viðkomandi kost á að fá fund með þingnefndinni.

Spilling er talin hyglandi verknaður sem er sérstaklega gerður til hagsbóta fyrir hann sjálfan eða aðra tengda honum.

Má líta svo á að sitjandi þingmaður sem situr í stjórnskipunar- og eftirlitsnefnd Alþingis og hylmir með ofangreindum hætti yfir rökstuddri og alvarlegri valdnýðslu og spillingu stjórnsýslunnar geti flokkast sem spilltur þingmaður?

Er umræddur þingmaður spilltur?

 

.

 

„Rótlausir kennitöluflakkarar í pólitík“

Lögreglan fer ekki að lögum

 Hér fara rök lögreglu eftir að ráðuneytið úrskurðaði að lög heimiluðu ekki synjun flutnings vegna vöntunar á leyfi skipulagsyfirvalda.

"Í ljósi ofangreinds, þess að leyfi byggingafulltrúa liggur ekki fyrir og þar með sjónarmiða um umferðaröryggi með vísan til þeirrar auknu hættu og óhagræðis sem skapast þurfi að flytja hús ítrekað um vegakerfið þar sem heimild fyrir niðursetningu liggur ekki fyrir, þá hafnar lögreglan þessari beiðni."

 Hinsvegar fekkst leyfi lögreglu að flytja stofurnar til Hafnarfjarðar og þá var ekið með þær um Sandskeið á leið til Hafnarfjarðar. Ekið var yfir 50 kílómetra til Hafnarfjarðar en aðeins 18 kílómetrar eru upp á Sandskeið.

Lögreglan hundsar úrskurð ráðuneytis og fer ekki að lögum. 

Hér er á ferð augljós valdnýðsla og valdhroki lögreglu með  misnotkun á umferðaröryggi. 

Ráðherra eða ráðuneytið grípur ekki í taumana þrátt fyrir ítrekaðar beiðnir þar um en svo virðist sem ráðuneytið sé stjórnlaust og lamað þessa daganna.

 

Standa í stríði um skólastofur

Lögreglan utan laga, sjá blogg

Svifflugfélagið hefur í heilt ár barist fyrir á fá að flytja lausar kennslustofur sem félagið keypti á Sandskeið.

Vegagerðin, síðar Samgöngustofa hafa hinsvegar barist gegn flutningnum og bannað hann.

Fyrir rúmri viku úrskurðaði loks Innanríkisráðuneytið með hjálp Umboðsmanns Alþingis í kærumáli Svifflugfélagsins og Samgöngustofu og komst að þeirri niðurstöðu að höfnun stofnunarinnar væri brot á lögum og feldi úr gildi höfnun við flutningi á kennslustofunum. Málaástæður Svifflugfélagsins voru að fullu teknar til greina, að starfsreglur lögreglu og Samgöngustofu um að sveitarfélag heimilaði flutning, stæðist ekki lög.

 

Nú hefur lögreglan ákveðið að styðja lögbrjótana hjá Samgöngustofu og heimilar ekki heldur umræddan flutning á sömu forsendum og Samgöngustofa. Lögreglan telur sig með þessari ákvörðun hafin yfir lög landsins og hundsar um leið úrskurð ráðuneytisins.

Lögreglan ítrekar aðeins að félagið geti bara kært þessa ákvörðun.

Eitt af siðlausustu brotum yfirvalda er valdníðsla í krafti valdsins á hendur borgurunum. Viðhorf lögreglu til lögbrota á sviði stjórnsýslu er óásættanleg. Lögregla sem löggæslustofnun hikar ekki við að sniðganga lög landsins og virðist þannig vilja sýna stuðning við aðra lögbrjóta með gerðum sínum.

Á meðan standa umræddar kennslustofur hættulegar börnum og hálf brunnar á skólalóð Rimaskóla.

Innanríkisráðherra virðist eini aðilinn sem getur hnekkt lögleysu lögreglunnar.

 

Formaður

Skoða virkara eftirlit með lögreglu

Flugyfirvöld andvíg flugstarfsemi?

Spennandi og skemmtileg frétt fyrir okkur Íslendinga.

Hvernig má það hinsvegar vera að á síðustu 4 árum hefur lofthæfum almannaloftförum fækkað um helming á Íslandi, einu Evrópulanda?

Jú Íslensk flugyfirvöld, það er Flugmálastjórn og Innanríkisráðuneyti með Ögmund  Innanríkisráðherra sem æðsta mann, hófu árið 2010 krossferð gegn almannaflugi og árangurinn er sá að svokölluðum EASA almannaloftförum, sem eru kennsluflugvélar, einkaflugvélar og svifflugur hefur fækkað um helming. Flugmálastjórn hóf skyndilega að kyrrsetja tugi loftfara og gerði mönnum illmögulegt að halda loftförum flughæfum. 

Ef þessi stefna yfirvalda heldur áfram mun almannaflug leggjast af og atvinnuflugið bíða mikinn skaða þar sem Ísland mun þurfa að leita erlendis að flugmönnum ef þá verður eitthvert íslenskt flugfélag starfandi hér á landi.

 Það er því verk að vinna fyrir nýjann Innanríkisráðherra að snúa ofan af sjálfseyðingarstefnu núverandi flugyfirvalda. 

 

Aukin eftirspurn eftir flugmönnum

JÁ við nýrri stjórnarskrá okkar.

JÁ það er heiður að fá að kjósa um nýja stjórnarskrá sem fólkið í landinu vann og samdi.

JÁ það er heiður að taka þátt í að setja lýðveldinu nýja stjórnarskrá.

JÁ það er heiður að fá að hjálpa til við að ljúka gerð nýrrar stjórnarskrár með að segja JÁ við fyrstu spurningunni.

Kosning hafin - talningin tímafrek

Dómstólar hafa brotið ítrekað á mannréttindum.

Það er fagnaðarefni að mannréttindadómstóllinn heggur niður þann svarta blett sem hefur verið á samfélaginu vegna sérkennilegra dóma í svokölluðum meiðyrðarmálum. 

Íslenskir dómstólar hafa þar lengi farið offari og veruleg spilling ríkt kringum mörg þeirra mála.

Áfrýjunarleyfi frá hæstarétti hafa aðeins flokksgæðingar Sjálfstæðisflokksins fengið, Árni Matt og Björn Bjarnason, aðrir ekki.

Hvað með alla aðra fyrri meiðyrðardóma sem dómstólar íslands hafa dæmt þvert á dómavenjur Mannréttindadómstólsins?

Athygli vekur að það virðist þurfa erlenda íhlutun til að koma á mannréttindum og taka til í dómskerfinu.

Dómur Mannréttindadómstólsins er fagnaðarefni. 

Unnu mál gegn ríkinu

Vodafone netfangið bilað

Ég var farinn að furða mig á að  engin svör bárust við tölvupóstum sem ég hafði sent út undanfarið.
Í gær kom í ljós að aðalnetfangið mitt hjá Vodafone hafði verið bilað í tæpan hálfan mánuð.
Ég gat sent út en engin póstur barst til baka.
Vodafone þjónustan svaraði að breytt hafi verið einhverjum netþjóni.
Þeir sögðust líta á þetta eftir nokkra daga og ég gæti ekki gert neinar kröfur því að netfangið væri ókeypis og því mætti viðgerðin afgangi.

Hef haft þetta netfang í bráðum 20 ár og borgað stórfé fyrir það sem og tölvutenginguna í gegnum tíðina.

Nú bíð ég eftir að geta sent tugum aðila póst, erlendum viðskiptaaðilum sem og ráðherrum,  og sagt þeim að nú hafi Vodafone lagað netþjóninn og nú sé hægt að senda mér aftur gamla póstinn.

Enn pattstaða á Álftanesi

Eftir að Álftanes fór í greiðsluþrot haustið 2009 varð flestum ljóst að ekki var að óbreyttu rekstrargrundvöllur fyrir rekstri sveitarfélagsins.

Fjárhaldsnefnd sem ráðherra skipaði fór í verulegan niðurskurð á rekstri sveitarfélagsins sem nam yfir 100 millj.  á ári, um 8% af útgjöldunum. Skattar og álögur á íbúa voru einnig hækkaðir um svipaða upphæð.

Þá var farið í sameiningarviðræður við Garðabæ en strax var ljóst að Garðabær var ekki tilbúinn til sameiningar á þeirri stundu.

Öll framboð lofuðu íbúum Álftaness sameiningu strax eftir kosningar.  Eftir kosningar bauð Reykjavík Álftnesingum að sameinast Reykjavík en ný bæjarstjórn Álftaness hafnaði þeirra boði og vildi aðeins viðræður við Garðabæ.

Áfram var haldið að ræða við Garðabæ þó engin sameining væri á döfinni við Garðabæ nema forsendur breyttust.

Nú liggja fyrir samningar sem fjárhaldsstjórnin hefur gert við stærstu lánadrottna um afskriftir á um 30% skulda með því skilyrði að búið verði að samþykkja sameiningu Álftanes við eitthvert sveitarfélag í almennri  kosningu fyrir 15. maí næstkomandi.

Þrátt fyrir þessa samninga fjárhaldsstjórnar ætlar bæjarstjórnin ekki að undirbúa sameiningakosningar fyrir 15. maí.  Öll bæjarstjórnin virðist vilja sitja áfram sem lengst.

 
Sú míta að bygging sundlaugarinnar hafi sett sveitarfélagið í þrot er æði útbreidd en kolröng.  Álftanes hefur enn ekki greitt til byggingar sundlaugarinnar en fékk þess í stað yfir 300 millj. í reiðufé vegna sölu íþróttarhússins.  Þannig frestaði sundlaugin fjarþroti Álftanes um eitt ár.

Ákvörðun sveitarfélagsins um mikla og hraða uppbyggingu árið 2002 sem ákveðið og stýrt var af sjálfstæðismönnum gerði sveitarfélagið gjörsamlega ósjálfbært.

Langstærsti útgjaldaliður allra sveitarfélaga er rekstur skóla, leikskóla og tómstundastarfsemi barna og unglinga.

Hlutfall grunnskólabarna miðað við íbúafjölda sýnir okkur að Álftanes getur ekki verið sjálfbært ef bjóða á íbúum sömu þjónustu og er í boði í nágrannasveitarfélögum.

Álftanes, grunnskólabörn 18,9% af íbúum

Reykjavík, grunnskólabörn 10,4% af íbúum

Garðabær, grunnskólabörn 12,7% af íbúum

Rekstur kostnaðasömustu málaflokkana á Álftanesi er þannig yfir 80% stærri en í Reykjavík og um 50 % stærri en í Garðabæ.

Ef Álftanes hefði strax gengið til sameiningar við Reykjavík hefðu aukaálögur og niðurskurður á ibúana ekki kostað íbúa Álftanes 80 -150 milljónir á ári eða að meðaltali  30 til 60 þúsund krónur á íbúa á ári. Það er sú fórn sem íbúar leggja fram í þeirri von bæjarstjórnar að sameinast síðar Garðabæ.

Íbúar dæma um hvort sú fórn er ásættanleg.

Kristján Sveinbjörnsson

Fv bæjarfulltrúi

Íbúafundur fyrir lok mánaðar

Framkvæmdastjóri og/eða bæjarstjóri?

Aftur og aftur lenda sveitarstjórnir í ógöngum vegna kerfis sem gengur ekki alltaf upp.

Því er fróðlegt að bera saman bæjarstjórnarkerfi okkar og annarra nágrannalanda. 

Bæjarstjórnarkerfið sem við notumst við er orðið mjög gamalt og virðist löngu gengið sér til húðar. Hin norðurlöndin eru með annað kerfi, svipað á milli landa og virðist mun skilvirkara og faglegra en okkar.

Kerfi sem norðurlöndin nota ha­fa öflugan framkvæmdastjóra, sem hefur gjarnan sérstaka menntun fyrir starfið, er ekki tengdur pólitíkinni og kemur gjarnan annarstaðar frá og býr jafnvel utan sveitarfélagsins. Hann stýrir daglegum rekstri sveitarfélagsins og gætir að faglega þættinum.

Þá er bæjarstjórnin mun fjölmennari á hinum norðurlöndunum, gjarnan 31 til 65 manns og kemur hún saman u.þ.b. 10 sinnum á ári. 

Bæjarstjórnin kýs úr sínum röðum bæjarstjóra (borgmester) er kemur fram sem pólitískur leiðtogi bæjarstjórnarinnar og stýrir hann bæði bæjarstjórnar- og bæjarráðsfundum. 

Almennur bæjarfulltrúi fær frekar lítilð greitt fyrir setu í bæjarstjórn.  Bæjarráðsmenn sem eru gjarnan 7 til 11 hafa mun stærra hlutverk og eru hærra launaðir. Þeir eru í hlutastarfi og jafnvel í fullu starfi í stærri sveitarfélögum.

Með öflugan og vel menntaðan framkvæmdastjóra er meiri líkindi á góðri og markvissri stjórn sveitarfélagsins. Þá er mun meira mannaval til bæjarstjóra í fjölmennri bæjarstjórn en hann kemur ávallt úr röðum bæjarfulltrúa. Í fjölmennri bæjarstjórn er mun minni hætta á að einhver "einn" hafi oddaaðstöðu sem þurfi jafnvel að kaupa með einhverjum hætti eins og við þekkjum svo vel. 

Ekki er annað að heyra á sveitarstjórnarmönnum og framkvæmdastjórum hinna norðurlandana, að þeir líki þetta kerfi og telji það gott og skilvirt.

 

 

 

Guðríður yrði bæjarstjóri

Flugmálastjórn sniðgengur stjórnsýslulög.

Flugmálastjórn sem íslensk stjórnsýslu- og eftirlitsstofnun á í miklum erfiðleikum með að fylgja stjórnsýslulögum.

Stofnunin fer nú offari í túlkun og framkvæmd nýrra evrópureglna, svokallaðra Part-M reglna, um viðhald loftfara og hefur ekki getu til að rökstyðja nýjar íþyngjandi stjórnvaldsákvarðanir sem hún tekur.  

Stofnunin skýlir sig á bak við eigin ákvörðun, að leynd hvíli á stjórnsýslu stofnunarinnar og synjar um aðgang að umbeðnum gögnum.

Lögmaður Svifflugfélagsins telur að Flugmálastjórn hafi brotið á félaginu á eftirtöldum ákvæðum stjórnsýsluréttar:  lögmætisreglu, meðalhófsreglu, leiðbeiningarskyldu, jafnræðisreglu og upplýsingaskyldu  ásamt fjölmörgm öðrum lagaákvæðum, sjá gögn með fyrri færslu. http://flugmann.blog.is/blog/flugmann/entry/1205542/

 

Í vikunni rann út lögbundinn frestur Flugmálastjórnar á að rökstyðja íþyngjandi og smásmugulegar stjórnvaldsákvarðanir vegna úttektar á TF-SAA og framsettar óásættanlegar kröfur vegna beiðni um ferjuflug.

Í 21. gr. stjórnsýslulaga segir skýrt,  “Beiðni um rökstuðning………skal stjórnvald svara henni  innan 14 daga frá því að hún barst.”

 

Nú eru liðnir 28 dagar frá fyrstu kröfu um rökstuðning og þrátt fyrir ítrekanir hefur Flugmálastjórn ekki svarað kröfunni en bregst við síðustu ítrekun með að nefna að hún hafi jú rökstutt málið. 

 

Ekki verður séð að stjórnvaldsákvarðanir Flugmálastjórnar byggist á upplýstum og fyrirliggjandi rökum en margar ákvarðanir stofnunarinnar eru teknar af geðþótta sem erfitt hefur reynst fyrir stofnunina að rökstyðja.

 

Von okkar er að athugasemdir við óásættanlega stjórnsýslu FMS verði til þess að stjórnvöld taki flugmálastjórnir annarra norðurlanda til fyrirmyndar og vinni með almannafluginu að lausnum í stað stríðsátaka, áður en óbætanlegt tjón verður á íslenskri flugstarfsemi. Enn er því miður ekki að finna vilja stjórnvalda til að breyta.

 

Lausnin felst ekki í orðum flugmálastjóra við hagsmunaaðila, 

“Flugmálastjórn ræður,  ef þið eruð ekki sátt,  þá getið þið kært.”

 

Lausnin felst í samstarfi yfirvalda og hagsmunaaðila.