Spásvæðið talið öskusvart en hver er raunveruleikinn?

Sá er þetta ritar flaug yfir gosstöðvarnar í gær. Grár strókur stóð upp úr sprengigígnum og spúði ösku upp í loftið. Undrun vakti þó hversu gosið var lítið. Einhver tonn á sekúntu streyma þarna upp en að þetta magn fylli loftrými norður atlantshafsins allt frá Írlandi og Spáni til Grænlands af gosösku er í hæsta máta ótrúlegt. Ekkert heyrist frá mælingarsérfræðingunum sem mælt hafa magn gjóskunnar í lofti en athygli vekur gosöskuspá bresku veðurstofunnar byggir fyrst og fremst á reiknilíkani og öskuspá sem ekki eru sannreyndar eftir því sem best er vitað með mælingum.

Samkvæmt mælingum í Reykjavík http://www.loft.rvk.is/ hefur ekki orðið vart við öskufall í Reykjavík en það segir okkur að engin gosaska er yfir Reykjavík og samkvæmt því virðist flugbannið á Reykjavíkurflugvelli vera enn með öllu óþarft hvað sem síðar verður. Heyrst hefur að verðið sé að koma fyrir mælingarbúnaði i einhverjar flugvélar. 

Ef flugviðvörunarsvæði http://www.metoffice.gov.uk/corporate/pressoffice/2010/volcano/ashconcentration/ er skoðað er ekki svart svæði yfir  Reykjavík nú né næstu daga.

Því væri gott að fá skýringar á flugbanninu frá Reykjavíkurflugvelli t.d. nú í dag.

 

 

 

 

Háloftin áfram öskusvört

Athugasemdir

[Hvumpinn, 9.5.2010 kl. 23:52]

Þetta er með ólíkindum, það eru bara spár og reiknilíkön á bakvið þessar lokanir, engar mælingar.

[Sigurður Haraldsson, 9.5.2010 kl. 23:54]

Kristján ef þú hefðir litið upp í loftið fyrir ofan þig í dag þá hefðir þú séð ástæðuna það mátti sjá bakkan frá eldstöðinni sem lagði yfir bæinn og langt í vestur!

[Sigurður Haraldsson, 9.5.2010 kl. 23:56]

Farið austur og hjálpið til við hreinsun á landinu sem askan hefur komið niður þá munið þið skilja alvöru málsins!

Öskustrókurinn liggur út á haf og upp í háloftin og sveimar yfir ykkur!

[KRISTJÁN SVEINBJÖRNSSON, 10.5.2010 kl. 00:09]

Vegna orða Sigurðar vil ég vekja athygli á að ekkert öskufall hefur orðið á Reykjavíkursvæðinu nú síðustu daga. Mjög bjart var ef horft var til vesturs, norðurs og austurs. Rétt er að mystur var til suðurs yfir Reykjanessfjallgarðinum sem líklega var þó bara rakamystur rétt eins og yfir suðurlandi í gær. Allavega eru engar mælingar sem sýna hvar raunverulega askan er og þá í hvé miklu mæli. En það er alveg klárt að ösku er að finna út frá Eyjafjallajökli enda sést hún þar greinilega.  Þá vek ég athygli á að askan er jú þyngri en loftið og fellur hægt og sígandi niður niður til jarðar þar sem hún sveimar um.