Sameiningarmál, vilji íbúa og forsendur

Niðurstaða skoðanakönnunar á Álftanesi um sameiningakosti kemur ekki á óvart.
Vissulega eru íbúar að greiða atkvæði með fótunum og ber niðurstaðan greinilega þess merki.
Engin umræða eða skoðanaskipti hafa farið fram meðal Álftensinga um sameiningamál og nær engar upplýsingar liggja fyrir um kosti og galla sameiningar.

Því miður var illa að þessari könnun staðið svo mjög að spurningar sem bornar voru upp fengu ekki lögbundna afgreiðslu sveitarstjórnar og hafa stjórnsýslulega séð því lítið gildi. Þessi vinnubrögð rýra niðurstöðuna.

Samt sem áður staðfestir könnunin þann vilja íbúana að leysa óásættanlega stöðu sveitarfélagsins með sameiningu.

Í bæjarráði liggur óafgreidd tillaga úr bæjarstjórn frá því í desember um að kanna sameiningarmöguleika við nágrannasveitarfélögin.
Garðabær hefur þegar hafnað viðræðum að óbreyttri stöðu en skuldir og samsetning Álftaness passar ekki við Garðabæ og veruleg andstaða er innan bæjarstjórnar Garðabæjar með sameiningu við Álftanes.

Engar formlegar eða óformlegar viðræður hafa farið fram við önnur sveitarfélög.

Hafnarfjörður kemur vissulega til greina enda er nú þegar mikið samstarf milli þessara sveitarfélaga og vilji til viðræðu hjá báðum aðilum.
Margir íbúar völdu hinsvegar ekki Hafnarfjörð þar sem talið er að fjárhagsstaða Hafnarfjarðar sé lítið betri en Álftaness.

Þá kemur fram áhugi fyrir Reykjavík sem líklega er vegna stærðarinnar þar sem margir telja að borgin hafi burði til að bjóða þá þjónustu sem fyrir er á Álftanesi.
Leynd er yfir þeirri staðreynd að skuldir Reykjavíkur eru mjög miklar og þrátt fyrir miklar eignir þá er fjárhagsleg staða Reykjavíkur erfið enda skuldir pr. íbúa þær langhæstu eða meir en tvöfalt hærri en annara sveitarfélaga á höfuðborgarsvæðinu.
Þá er ljóst að ýmsir fulltrúar borgarinnar horfa á Bessastaðanes sem land tækifæranna gagnvart uppbyggingu eða mögulegum flugvelli.

Kópavogur og Seltjarnarnes eru varla raunhæfir kostir.

Þrátt fyrir aðkomu fjárhaldsstjórnar hafa forsendur eða rekstur sveitarfélagsins ekkert breyst.
Að óbreyttu fer sveitarfélagið aftur í þrot innan skams.
Enn hafa ekki nauðsynlegir fjármunir komið til að reka sveitarfélagið eða fram hafa verið aðrar tillögur að lausn en hinn óraunhæfi niðurskurður.  Þá mun útsvarsálagið að óbreyttu knýja íbúana til að flýja Álftanes í nóvember næstkomandi og losna þeir þar með undan aukaálaginu.

Með riftun og eða breytingu á samningum um uppbyggingu á miðsvæðinu og sjálfsagðri leiðréttingu á jöfnunarsjóði og sölu eigna til að fjármagna kaup á íþróttamannvirkjum þá er möguleiki að reka sveitarfélagið enn um sinn áfram í þröngri stöðu.
Hinsvegar finst lítill sem enginn vilji til að fara í þessar aðgerðir og verður sveitarfélagið líklega knúið til sameiningar.
Hugmyndir að niðurfellingu skulda telja margir algjörlega óraunhæfa því niðurfellingin kostar sveitarfélög og opinber fyrirtæki landsins hækkað vaxtaálag sem nemur margfalt mögulegri niðurfellingu ár hvert. 1% vaxtaálag á lán sveitarfélaga og opinberra fyrirtækj kostar 5-7 milljarða á ári.

Af því gefnu að afstaða Garðabæjar breytist ekki mun valið um sameiningu standa á milli Reykjavíkur og Hafnarfjarðar.

Hér eru skuldir A og B hluta nokkurra sveitarfélaga miðað við fjárhagsáætlanir fyrir árið 2010

       Skuldir í milljörðum      Íbúafjöldi         Skuldir pr. íbúa í milljónum
Reykjavík         310,5          118.427                          2,6

Hafnarfjörður     38,2           25.872                           1,5

Kópavogur         38,1          30.314                            1,3

Álftanes              3,1            2.524                            1,2

Garðabær           4,7          10.587                            0,4

Í þessari töflu er ekki tekið tillit til skuldbindinga né eigna sveitarfélaganna.

Kristján Sveinbjörnsson
Bæjarfulltrúi  

Flestir Álftnesinga vilja sameinast Garðabæ

Athugasemdir

[Ari (IP-tala skráð) 10.3.2010 kl. 00:18]

Og hvernig veist þú af öllum mönnum um þessar leyndu skuldir R.víkur? Af Hverju ætti ég að trúa þessu frá einhverju bloggi, þetta hefur ekkert komið í fréttir.

Geturðu skúbbað þessu í fréttirnar kaddlinn?

[KRISTJÁN SVEINBJÖRNSSON, 10.3.2010 kl. 11:38]

Á heimasíðu Reykjavíkur er fjárhagsáætlun fyrir 2010. Þar koma þessar tölur fram.  Inni í skuldum Rvk-borgar eru m.a skuldir Orkuveitunar sem eru mjög miklar og Rvk-borg ber ábyrgð á og tryggir. 

Erfitt er að átta sig á skuldum borgarinnar þar sem eignir og tekjur koma á móti. Einhverra hluta vegna hefur ekki verið vilji til að fjalla um þessi mál opinberlega enda viðkvæm. Ef Rvk lendir í vandræðum þá mun fyrst hrikta í öllu samfélaginu. 

[Ari (IP-tala skráð) 10.3.2010 kl. 16:56]

Þakka svarið.

 Kv. 

Ari